Pơma tơ̆ jơ pơm lêh, Kơdră Quốc hội Trần Thanh Mẫn pơma hơdăh, dôm tơdrong jang pơgơ̆r păng tơƀôh đơ̆ng Tổng bí thư Nguyễn Phú Trọng hăm hơnăp jang pơjing, hơmet pơ ‘lơ̆ng Teh đak chĕp kơ̆l pơgơ̆r kiơ̆ khôi luơ̆t xã hội chủ nghĩa pơma atŭm păng tơplih ‘nao pơgơ̆r, bơ̆jang đơ̆ng Quốc hội pơma hơdrô̆ đei lăng kiơ̆ đơ̆ng yan âu lơ, tơƀôh trĕng lăng tôm tơdrong đơ̆ng ƀok Tổng Bí thư; tơƀôh tơdrong kơjăp chủ nghĩa Mác - Lênin, đon tơchĕng Hồ Chí Minh găh Teh đak chĕp kơ̆l pơgơ̆r kiơ̆ khôi luơ̆t xã hội chủ nghĩa.

Kơdră Quốc hội Trần Thanh Mẫn athei tơ̆ hơnăp kơnh, Ban Tuyên giáo Trung ương pơgơ̆r jang hơdai hăm Anih chĕp kơ̆l pơgơ̆r Quốc hội, Anih in tơlĕch hla ar Chĭnh trĭ teh đak Tơpă păng dôm anih jang chih kơtơ̆ng ang akŏm tơroi tơbăt găh tơdrong kơsâp hla ar truh hăm lơ lap kang ƀô̆, đảng viên, bơngai tăh hla păng kon pơlei hăm lơ trong jang hơiă, hơgei, ‘lơ̆ng, đei yua.