Lơ̆m ‘măng năm tơmang lăng tơ̆ teh đak Lào păng vang truh Hop akŏm Khul kơdră chĕp kơ̆l AIPA-45, pơgê 18/10, tơ̆ anih tơm Vientiane, Kơdră Quốc hội Trần Thanh Mẫn đei jơ pơma nuh hăm Tổng Bí thư Khul kơdră chĕp kơ̆l Trung ương Đảng Kon pơlei kăch mang Lào, Kơdră teh đak Cộng hòa Dân chủ Nhân dân Lào Thongloun Sisoulith. 

Ƀar ‘nu ƀok Kơdră tơchĕng ‘lơ̆ng tơdrong jang tŏk ‘lơ̆ng,pran kơjăp lơ̆m tơdrong pơvei gĭt kăl, mât 1 ƀơ̆r đon păng jang hơdoi tôm tơdrong Việt Nam-Lào lơ̆m dôm sơnăm âu ki, lơ̆m noh đei tơdrong tơgop tôch gĭt kăl đơ̆ng Quốc hội 2 teh đak; pơma hơdăh, tơ̆ hơnăp kơnh, 2 păh athei tơiung hlŏh dơ̆ng tơdrong juăt jang hơdoi, lui băl, kŭm hăm băl jang kiơ̆ ‘lơ̆ng dôm tơdrong drơ̆ng nơ̆r, lơ̆m noh đei tơdrong drơ̆ng nơ̆r đơ̆ng ‘măng tơƀât 2 Anih tơm Chinh trĭ lơ̆m khei 9/2024 âu ki; hơnơ̆ng pơm hơtŏk tơdrong jang hơdoi đơ̆ng 2 anih chih pơjing luơ̆t kơ 2 teh đak, jang hơdoi kơjăp ‘lơ̆ng, tơgŭm băl lơ̆m rim hop akŏm Nghị viện păng apŭng plenh teh nhen IPU, AIPA, APPF; jang hơdoi kơjăp tơ̆ dôm hop akŏm lơ̆m tơring păng lơ̆m apŭng plenh teh.