Kơdră Quốc hội Trần Thanh Mẫn pơma hơdăh, Việt Nam hơnơ̆ng druh kiơ̆ trong jang hơmet kơjăp păng tưk tơiung tơdrong pơvei jang hơdoi ‘lơ̆ng hơiă hăm Trung Quốc, năng ‘nâu jĭ trong jang ưh đei tơplih, tôch ‘lơ̆ng, jĭ tơdrong rơih đunh đai păng pơ ‘nhŏ jang hơdrol hlŏh lơ̆m trong jang tơbôl kơdih, rơngei hiôk hian, jang hơdoi păng jang tŏk, lơpang lơ̆m tơdrong jang tpơbôl đơ̆ng teh đak Việt Nam.

Găh tơdrong jang hơdoi Nghị viện, Quốc hội Việt Nam păng Quốc hội Trung Quốc hơnơ̆ng tưk tơiung hơnăp jang chih pơjing luơ̆t păng dăr lăng tơdrong pơm hơtŏk tơdrong pơvei kơ 2 teh đak, hơtŏk tơdrong pơma nuh găh tơdrong juăt jang vă hơmet pơ ‘lơ̆ng trong chĕp kơ̆l pơgơ̆r, pơjing Teh đak chĕp kơ̆l kiơ̆ Luơ̆t xã hội chủ nghĩa hăm tơdrong chĕp kơ̆l pơgơ̆r đơ̆ng Đảng.