Tơ̆ kang kưt Nà Nưa, Kơdră Quốc hội Trần Thanh Mẫn păng Khul jang ‘măn mĭnh pơnĭt kŭp kơ̆l ƀlŏk hơdơ̆r kơ Ƀok Hô; tơƀôh jơhngâm đon ‘mêm bơnê tôch pơnĕh hăm kŏng tih tên đơ̆ng Ƀok Hô, kơdră chĕp kơ̆l tôch rơgei, đĭ jơhnơr plang ăn tơdrong rơngei hiôk hian kơ hơdrĕch hơdrung, pơjing đei 1 teh đak kơjăp ‘lơ̆ng, hơnhăk tơdrong arih xa hiôk chơt ăn kon pơlei. 

Đơ̆ng rŏng kơ ‘nŏh, Kơdră Quốc hội Trần Thanh Mẫn truh sŏh nhang păng pơtăm ‘long tơ̆ Hnam soi Tân Trào, anih pơgơ̆r Hop akŏm Bơngai tang măt lơ̆m teh đak lơ̆m dôm năr 16 păng 17/8/1945, tơchơ̆t tơdrong iung tơblăh tơgar iŏk tơdrong chĕp kơ̆l pơgơ̆r lơ̆m teh đak. Kơdră Quốc hội Trần Thanh Mẫn ‘mĕh vă kŭm hăm đĭ đăng Đảng, đĭ đăng khul linh păng kon pơlei adrin tơlĕch jang đei jơnei ‘lơ̆ng dôm trong jang tih đơ̆ng Trung ương Đảng, Quốc hội, Khul kơdră teh đak vă hơnhăk teh đak bơ̆n yak mât lơ̆m chăl ‘nao, chăl jang tŏk pơdrŏng, hơnŭk hơnoa kơ hơdrĕch hơdrung.