Kơdră Quốc hội Trần Thanh Mẫn pơma hơdăh, lơ̆m jơhnơr arih hơtŏk tơiung kơ 3 teh đak, tơdrong tơgoăt tơgoăl gĭt kăl, tơdrong pơvei tơbôl teh đak tơjê̆, joăt joe păng jang hơdai tôm tơdrong đơ̆ng 3 Đảng, teh đak, kon pơlei păng drŏ kăn 3 teh đak ‘noh jĭ tơdrong tơm gĭt kăl vei sơđơ̆ng tơdrong hơtŏk tơiung tơ̆ rim teh đak păng tơring. Đảng, teh đak păng kon pơlei Việt Nam ling lang lăng kăl, vei răk păng pơtrŭt tơdrong pơvei tơbôl joăt joe hăm Đảng, teh đak păng kon pơlei Lào păng Campuchia.

Kơdră Quốc hội chơt hơiă lăng ƀôh tơdrong pơvei tơbôl joăt joe đơ̆ng 3 teh đak păng Khŭl drŏ kăn 3 teh đak roi ‘năr roi hơtŏk tơiung. Khŭl drŏ kăn 3 teh đak hlôi đei lơ tơdrong jang tơroi băl hơdăh tơgop hơtŏk loi dơ̆ng tơdrong pơvei păng pơtrŭt tơdrong hơtŏk tơiung đơ̆ng drŏ kăn tơ̆ rim teh đak, mă loi ‘noh jĭ tơdrong kĭ pơkăp păng jang kiơ̆ Tơdrong drơ̆ng nơ̆r jang hơdai jăl jang 2022 - 2027 hăm dôm tơdrong hơdăh ‘lơ̆ng, pơm lăp hăm ‘meh vă đơ̆ng drŏ kăn păng Khŭl drŏ kăn 3 teh đak.