Lơ̆m jơ năr pơgơ̆r Hop akŏm Nghị viện jang hơdai nơ̆r Phalăng găh choh jang sa kơjăp, sơđơ̆ng phe ƀa tơmam sa păng tơjră hăm tơplih tŏ ‘mi kial păng Hop akŏm Khŭl chĕp kơ̆l pơgơ̆r Jơnŭm Nghị viện nơ̆r Phalăng (APF), kơsơ̆ brei (22/1), tơ̆ pơlei tơm Cần Thơ, Kơdră Quốc hội Trần Thanh Mẫn hlôi sơng Phŏ Kơdră mă mônh Thượng viện Campuchia Ouch Borithp. Kơdră Quốc hội Trần Thanh Mẫn pơma hơdăh, Việt Nam ling lang lăng kăl, ‘măn tơgŭm hơdrol ăn tơdrong ưh kơ pơdơh hơmet ming păng hơtŏk tơiung pơvei teh đak tơ jê̆ băl ‘lơ̆ng hơiă, tơbôl joăt joe, jang hơdai tôm tơdrong, kơjăp đunh đai đơ̆ng 2 teh đak; ling lang ‘măn tơdrong tơgŭm ‘lơ̆ng hloh hăm Đảng kon pơlei Campuchia (CPP) păng teh đak Campuchia; tơgŭm 1 teh đak Campuchia hiôk hian, rơngei, hơtŏk tơiung hơnŭk hơnoa păng hơtŏk hơnăp jang, anih dơ̆ng lơ̆m apŭng plĕnh teh.

2 kơdră chĕp kơ̆l chơt hơiă lăng ƀôh, tơdrong pơvei 2 teh đak khei ‘năr âu ki hơnơ̆ng đei hơmet ming, hơtŏk loi dơ̆ng. 2 teh đak pơvei hơnơ̆ng pơma dơnuh khŭl kơdră kơpal păng rim kơdră; hơdai hăm hơtŏk loi dơ̆ng pơvei đơ̆ng 2 teh đak păng hăm Lào tơ̆ hơnăp kơnh vă 3 teh đak Đông Dương vang hơtŏk tơiung sơđơ̆ng, kơjăp tơgop hơdai ăn tơdrong rơngei, hơnŭk hơnoa kơ tơring.