Pơma tơ̆ lêh tơbăt, Kơdră Quốc hội Trần Thanh Mẫn akhan, Anih jô̆ hơlen jên teh đak roi đunh jang tŏk roi pran ‘lơ̆ng; vang tơgop pơjing anih jang jên hu teh đak rơgŏh ‘lơ̆ng, rơđăh rơđong, pran kơjăp, pơvih đei yoa ăn tơdrong jang hăm kơmăy kơmŏk chăl ‘nao păng mât hơdai hăm apŭng plenh teh đơ̆ng teh đak bơ̆n.

Kơdră Quốc hội Trần Thanh Mẫn athei, Anih jô̆ hơlen jên teh đak băt hơdăh păng bơ̆ jang trŏ hăm trong jang gĭt kăl đơ̆ng Đảng; Tơdrong tơchơ̆t đơ̆ng Quốc hội găh atŏk tơiung mŭk drăm - tơpôl, khul linh, vei sơđơ̆ng teh đak păng jang tơbôl; chĕp kơ̆l tơdrong vei lăng, pơgơ̆r bơ̆ jang đơ̆ng Khul kơdră teh đak găh thu mong, tơlĕch jên jang kơ teh đak, trong jang găh jên hu; rơih păng pơ ‘nhŏ hơdrol jên vă bơ̆ jang dôm tơdrong jang gĭt kăl lơ̆m Trong jang atŏk tơiung Anih jô̆ hơlen jên teh đak truh sơnăm 2030.