Pơma tơ̆ jơ roi tơbăt Tơdrong tơproh trong jang, Phó Thủ tướng Trần Hồng Hà ăn tơbăt, hla ar tơproh trong jang kơ dêh char Phú Yên đei chih pơjing hăm đon tơchĕng gơ̆h hơgei, băt lăng hơtăih kiơ̆ đơ̆ng lơ tơdrong ‘lơ̆ng pha ra băl găh tơmam drăm, jên hu păng jŏh ayo kơ dŏ xoang. Tơproh trong jang kơ dêh char jĭ hla ar chih “tôm tơdrong” đơ̆ng dôm tơdrong tơproh trong jang, vă tơƀôh trong jang tŏk lơ̆m tơdrong pơvei tôch kơjăp hăm dôm dêh char tơ̆ tơring tơter đak dơsi găh Pơbăh tơring Tŏk bŏk păng Tây Nguyên.

Vă jang đei dôm tơdrong ‘nâu, Phó Thủ tướng Trần Hồng Hà athei Phú Yên chih iŏk dôm ƀao hŏk gĭt kăl đơ̆ng jang tŏk kơ dôm tơring, hơnơ̆ng tơplih ‘nao rơgei, chă trong năm kơdih vă Phú Yên gơ̆h jing tơring tơgăl tơmât jên jang, tơgăl plang jơhngâm păng truh jang xa. Tơproh trong jang kơ dêh char Phú Yên chih hơdăh trong vă jang tŏk ăn Phú Yên tơ̆ hơnăp kơnh ‘moi kiơ̆ 1 anih kăl; 2 trong jang tơm; 3 tŏ jrăng gơnang; 4 tơdrong pơhnŏng; 5 tơdrong jang tơm đei tơlĕch vă adrin truh sơnăm 2030, Phú Yên jing dêh char jang tŏk pran kiơ̆ trong đei ƀôh păng kơjăp ‘lơ̆ng.

Bơ̆ jang hăm kơdră chĕp kơ̆l dêh char Phú Yên, Kơdră Quốc hội Vương Đình Huệ athei Đảng ƀô̆, Khul kơdră pơgơ̆r păng kon pơlei dêh char Phú Yên hơnơ̆ng tơlĕch jang đei yoa ‘lơ̆ng dôm tơdrong Tơchơt đơ̆ng Trung ương Đảng, Quốc hội, Khul kơdră teh đak, tơdrong tơm ‘nŏh jĭ vei kơjăp tơdrong jang tŏk, hơmet pơ ‘lơ̆ng dôm tơdrong oei tơhlăk vă bơ̆ jang đei dôm tơdrong hơgăt ăn sơnăm 2024 păng lơ̆m đĭ jăl jang; Dêh char athei đei jơhngâm đon sơđơ̆ng ‘lơ̆ng, tơchă đei dôm tơdrong pha ƀiơ̆ vă jang tŏk, ‘nŏh jĭ tơdrong đei hơdrô̆ găh tơmam drăm, cham char bri brăh, anih dơ̆ng, jŏh ayŏ kơ dŏ xoang.

Adrol kơ ‘nŏh, Kơdră Quốc hội Vương Đình Huệ bơ̆ jang hăm Khul kơdră chĕp kơ̆l đảng dêh char Khánh Hòa găh tơdrong jang chinh trĭ sơnăm 2023, trong vă jang sơnăm 2024 păng hơlen năng dôm tơdrong jang đei mưh bơ̆ jang tơdrong Tơchơ̆t kơsô̆ 55 đơ̆ng Quốc hội găh jang pơlong năng dôm tơdrong tơgŭm hơdrô̆ vă atŏk tơiung dêh char Khánh Hòa păng pơm Lêh roi tơbăt tơdrong Tơproh trong pơjing tơring kơdrâm ‘nao Cam Lâm, Khánh Hòa.