Ƀlep ƀât tơbăt 95 sơnăm pơjing Tổng Liên đoàn Lao động Việt Nam, pơgê brei (28/7), tơ̆ Hnam Việt Xô, plt Hà Nội, Tổng Liên đoàn Việt Nam pơm lêh hơpăh “Tơmam Nguyễn Văn Linh” ‘măng mă 4; pôk pơ ư Kơdră vei lăng công đoàn tơ̆ tơring, anih jang bơ̆ jang gơ̆h hơgei lơ̆m teh đak ‘măng mă 5 păng sơng Mê đai Bơ̆ jang dơ̆ng mă mônh đơ̆ng Kơdră teh đak pôk hơpăh ăn Tổng Liên đoàn Lao động Việt Nam. Kơdră Quốc hội Trần Thanh Mẫn truh akŏm păng iung pơma lơ̆m jơ pơm lêh.

Tang măt ăn kơdră chĕp kơ̆l Đảng, Teh đak, Kơdră Quốc hội Trần Thanh Mẫn pôk pơ ư dôm tơdrong jơnei ‘lơ̆ng hơiă đơ̆ng anih jang Công đoàn, khul đoàn viên, bơngai jang lơ̆m teh đak hlôi iŏk đei lơ̆m 95 sơnăm âu ki; hơiă hăm 10 ‘nu kăn ƀô̆ Công đoàn đei pôk hơpăh ăn Tơmam Nguyễn Văn Linh păng 95 ‘nu Kơdră vei lăng công đoàn tơ̆ tơring, anih jang bơ̆ jang gơh hơgei đei pôk pơ ư păng hơpăh ăn tơmam ‘măng mă âu. Kơdră Quốc hội Trần Thanh Mẫn athei, Công đoàn jơ̆p tơring hơnơ̆ng tơlĕch jang mă ‘lơ̆ng tơdrong tơchơ̆t đơ̆ng Hop akŏm mă 13 kơ Đảng; Tơdrong tơchơ̆t kơsô̆ 02 đơ̆ng Anih tơm Chinh trĭ găh tơplih anih jang, trong bơ̆ jang đơ̆ng Công đoàn Việt Nam lơ̆m chăl hle păng dôm trong jang đơ̆ng Đảng, tơdrong tơgŭm, khôi luơ̆t đơ̆ng teh đak găh anih jang, tơdrong jang kơ Công đoàn.