Kơdră Quốc hội Vương Đình Huệ truh akŏm păng iung pơma tơ̆ jơ pơm Lêh tơlĕch Khei druh dăm. Kơdră Quốc hội akhan, khei Druh dăm rim sơnăm ‘nŏh jĭ tơdrong jang tôch gĭt kăl, pơih blŭng ăn rim pơyan Puih mak ‘nao, pơyan kơ đe druh dăm sơnăm mơlôh; jĭ tơdrong pơchĕh rơgei đei chih akŏm đơ̆ng dôm tơdrong đei tơ̆ yăn âu lơ̆m tơdrong jang kơ đe druh dăm păng jang Đoàn.

Kơdră Quốc hội tơchĕng ‘lơ̆ng Trung ương Đoàn TNCS Hồ Chí Minh hlôi rơih hơnăn ăn tơdrong vă jang sơnăm 2024 ‘nŏh “Sơnăm Druh dăm năm jang tơgŭm”, chih hơdăh Khei druh dăm sơnăm ‘nâu ‘nŏh jĭ “Druh dăm năm jang tơgŭm yoa tơdrong arih xa tơpôl”; pơgơ̆r tơlĕch jang hơdoi Khei druh dăm păng Têt pơtăm ‘long rim jơhnơr ƀlŏk hơdơ̆r kơ Ƀok Hô hrơ̆ch hơdai, tơƀôh hơdăh jơhngâm đon jang tơnăp, khŏm jang đei đơ̆ng rim khul jang Đoàn.

Jang kiơ̆ Têt Pơtăm ‘long rim jơhnơr ƀlơ̆k hơdơ̆r kơ Ƀok Hô, Kơdră Quốc hội athei rim anih jang đoàn păng druh dăm, sơnăm mơlôh hơnơ̆ng chĕp vei, bơ̆ jang đei yoa ‘lơ̆ng dôm trong jang ‘nao, trong jang hơiă mưh pơtăm ‘long, pơjing bri, vei lăng cham char, tang găn tŏ ‘mi kial tơplih, vei kơjăp cham char arih xa rơgŏh ‘lơ̆ng. Lơ̆m dôm tơdrong jang kơ khei druh dăm mơ̆n, Kơdră Quốc hội Vương Đình Huệ vang truh Et hơtŏk Anih mong đŏk Hla ar ăn đe hơiŏh tơ̆ xăh Nam Thanh, apŭng Nam Đàn păng sŏh plang nhang tơ̆ Anih gru groa gĭt kăl Kim Liên, Anih gru groa kơ teh đak Truông Bồn.