Tơ̆ jơ pơma đam, Kơdră Quốc hội Vương Đình Huệ hơiă hăm Bangladesh găh dôm tơdrong jang đei tơjê̆ âu; mă loi, GDP tŏk hlŏh 7% lơ̆m jăl sơnăm 2021-2022, Bangladesh jing tĕh tĕch tơmam tơ̆ tĕh đak đe tih mă 2 lơ̆m apŭng plenh tĕh hăm dôm tơmam hơbăn ao păng jing tĕh đak năm hơdrol lơ̆m tơdrong pơjing dôm hnam kơmăy rơgŏh ‘lơ̆ng.

Kơdră Quốc hội oei pơtruh nơ̆r thơthou ăn Bangladesh pơgơ̆r đang ‘lơ̆ng tơdrong pôk rơih truh âu kơnh, bơ̆ jang đei “Trong jang truh sơnăm 2041”, hơnhăk tĕh đak Bangladesh jing tĕh đak jang hăm kơmăy kơ mŏk rơgei lơ̆m sơnăm 2041 ƀlep ƀât tơbăt 70 sơnăm pơjing tĕh đak. 2 ‘nu Kơdră pơma hơdăh năng kăl tơdrong pơvei ‘lơ̆ng hơiă đơ̆ng sơ̆ kơ Việt Nam-Bangladesh; pơma nuh păng drơ̆ng nơ̆r hăm 1,2 trong jang tih vă hơnhăk tơdrong pơvei jang hơdoi đơ̆ng 2 tĕh đak tŏk ‘lơ̆ng hlŏh dơ̆ng.

Kơsơ̆ ‘năr 21/9, tơ̆ Hnam hŏk jang tơbôl Bangladesh, Kơdră Quốc hội Vương Đình Huệ; Kơdră tang măt ăn Anih tơm jang tơbôl Bangladesh, Bơngai tang măt ăn Việt Nam tơ̆ Bangladesh Nguyễn Mạnh Cường truh kăt che Pơih pơdă um rup tơbăt 50 sơnăm pơvei jang hơdoi ‘lơ̆ng hơiă Việt Nam – Bangladesh yoa Anih chih tơdrong kơtơ̆ng ang Thông tấn xã Việt Nam pơgơ̆r.