Hăm jơhngâm đon tơpăt ‘lơ̆ng, tang măt ăn Quốc hội, bơngai tăh hla păng kon pơlei lơ̆m teh đak, Kơdră Quốc hội Vương Đình Huệ kŭp kơ̆l soh hlôt nhang tơƀôh jơhngâm đon ‘mêm bơnê tôch ai hăm Ƀok Hô. Kơdră Quốc hội roi tơbăt ƀât hơnăp Ƀok Hô, sơnăm 2023, Quốc hội hlôi jang kĕh tơdrong jang tôch lơ. ‘Măng mă blŭng lơ̆m jơhnơr arih xa 78 sơnăm bơ̆ jang, Quốc hội pơgơ̆r đei ‘măng hop akŏm lơ hlŏh lơ̆m 1 sơnăm hăm 05 ‘măng hop akŏm, hơlen năng, tơchơ̆t tơtom 84 tơdrong tih, gĭt kăl kơ teh đak, pơm lăp hăm tơdrong ‘mĕh vă tơ̆ yăn âu, pơjing tơdrong ‘lơ̆ng vă bơ̆ jang lơ̆m sơnăm 2024 păng dôm sơnăm đơ̆ng rŏng dơ̆ng.

Tơ̆ hơnăp Ƀok Hô, Kơdră Quốc hội Vương Đình Huệ păng Khul tang măt ăn kon pơlei vă hơnơ̆ng tơlĕch jang ‘lơ̆ng dôm tơdrong jang kiơ̆ jơhngâm đon tơplih ‘nao, vang yak hơdai kơjăp hăm Khul kơdră teh đak, hăm kon pơlei păng tơpôl tĕch mơdro, tưk tơiung tơdrong jang tŏk hrĕnh, kơjăp kơ teh đak, hơnhăk tơdrong arih xa phĭ tơtŏ dơnŏ ‘lơ̆ng, hiôk chơt ăn kon pơlei, hơnhăk teh đak tŏk dơ̆ng dang ei hăm dôm teh đak pơdrŏng jơ̆p plei teh nhen đon hơpơi ‘mĕh đơ̆ng Ƀok Hô adrol kơ lôch hơchăng sơ̆.