Kơdră Quốc hội Vương Đình Huệ tơƀôh đon hơiă mưh iŏk đei nơ̆r krao hơvơn đơ̆ng Kơdră Hạ viện Puan Maharani năm hơpong tơ̆ tĕh đak Indonesia, vang truh hop akŏm Kơdră chĕp kơ̆l Grŭp nghị viện dôm tĕh đak Đông Nam Á ‘măng mă 44 (AIPA-44), năm ngôi tơ̆ plt Jakarta ‘lơ̆ng rŏ.

Pơma truh tơdrong pơvei đơ̆ng 2 tĕh đak oei tŏk pran ‘lơ̆ng, Kơdră Quốc hội pơma hơdăh, ‘măng năm hơpong vă hơtŏk tơdrong pơvei đơ̆ng 2 tĕh đak găh rim anih jang, khul grŭp đei Đảng, nghị viện, Khul kơdră tĕh đak, tơring tơrang păng jang tơbôl kon pơlei.

Kơdră Quốc hội ăn tơbăt, ‘nâu jĭ ‘măng năm hơpong tơ̆ Indonesia mă blŭng hăm kơchư̆k Kơdră Quốc hội, tơƀôh đon hơiă tơ̆ hơnăp tơdrong jang tŏk đơ̆ng Anih tơm Jakarta – tơring kơdrâm tih hlŏh, đei kơsô̆ kon pơlei lăp 3% mă lei tơgop truh 20% ăn GDP tĕh đak Indonesia. Kơdră Quốc hội hơpơi ‘mĕh Anih tơm 2 tĕh đak hơtŏk tơdrong jang hơdoi, roi tơbăt ăn băl dôm tơdrong kăl mưh jang tŏk, mă loi ‘nŏh tơdrong Hà Nội-Jakarta vă pơih trong gre păr păr tơpăt hrôih.