Kơdră Quốc hội Vương Đình Huệ chơt hơiă hăm Khul tang măt ăn Đảng, Tĕh đak Cuba năm hơpong tơ̆ Việt Nam păng truh pơm lêh tơbăt 50 sơnăm ‘măng năm hơpong đơ̆ng Kơdră chĕp kơ̆l tĕh đak Cuba Fidel Castro truh tơ̆ tơring rơngei găh Pơbăh Việt Nam tơ̆ Quảng Trị (9-1973 / 9-2023). 2 ‘nu ƀok Kơdră Quốc hội tơchĕng ‘lơ̆ng tơdrong pơma nuh đơ̆ng dôm khul jang tih kơ 2 tĕh đak pơma atŭm păng đơ̆ng 2 Quốc hội pơma hơdrô̆ lơ̆m khei ‘năr âu ki.

Vă hơtŏk tơdrong pơvei, jang hơdoi đơ̆ng Quốc hội 2 tĕh đak tơ̆ hơnăp kơnh, 2 păh hơnơ̆ng tưk tơiung tơdrong pơgơ̆r tơƀâp, pơma nuh ăn kuan tih, mă loi jĭ đơ̆ng dôm Khul ngĭ si jang tơbôl păng dôm anih jang kơ Quốc hội. 2 ‘nu Kơdră Quốc hội oei drơ̆ng nơ̆r pơgơ̆r hop akŏm đơ̆ng Anih jang hơdoi nghị viện 2 tĕh đak lơ̆m sơnăm 2024.