Pơma tơ̆ jơ tơƀâp, Kơdră Quốc hội Vương Đình Huệ hơiă păng pôk pơ ư dôm bơngai tang măt Quốc hội, dôm anih jang kơ Quốc hội, dôm anih jang kơ Anih chĕp kơ̆l pơgơ̆r Quốc hội, kăn ƀô̆, bơngai jang tơ̆ Anih pơvih ăn Quốc hội bơ̆ jang tôch tơnăp ‘lơ̆ng, gơ̆h hơgei, jang đei lơ tơdrong jơnei tôch hơiă lơ̆m sơnăm 2023.

Pơma hơdăh, sơnăm 2024 jĭ sơnăm tôch gĭt kăl, jĭ sơnăm mă dôm anih jang, tơring tơrang athei jang tŏk mă pran vă gơ̆h jang đei dôm tơdrong hơgăt jang mŭk drăm, tơpôl lơ̆m đĭ jăl jang, Kơdră Quốc hội akhan, Quốc hội gơ̆h hưch hanh hăm dôm tơdrong jơnei hlôi iŏk đei lơ̆m sơnăm 2023, mă lei kŭm ưh gơ̆h lăp đon kơdih, lăng pơhơi, ưh kơchăng hăm rim tơdrong. Tơchĕng adrol, tơdrong jang lơm sơnăm ‘nâu tôch lơ, ‘ngoăih kơ dôm tơdrong jang hơnơ̆ng mưh chih pơjing luơ̆t, dăr lăng, tơchơ̆t dôm tơdrong gĭt kăl kơ teh đak păng dôm tơdrong jang nai hai, Anih pơvih ăn Quốc hội oei athei bơ̆ jang hơmet rim tơdrong vă năm truh ‘măng tơbăt 80 sơnăm năr Pơgơ̆r pôk rơih Quốc hội ‘măng mă blŭng.