Pơma tơ̆ jơ tơƀâp, Kơdră Quốc hội Vương Đình Huệ ăn tơbăt, hrei ‘nâu tĕh đak bơ̆n đei khul tĕch mơdro tŏk truh kơ triu ‘nu bơngai; oei vei lăng, chĕp kơ̆l pơgơ̆r hlŏh 900 rơbâu anih tĕch mơdro, lơ̆m nŏh 98% ‘nŏh jĭ anih tĕch mơdro kơdih. Kơdră Quốc hội Vương Đình Huệ ăn tơbăt, Đảng, Teh đak bơ̆n hơnơ̆ng năng kăl hơnăp jang đơ̆ng khul tĕch mơdro, anih tĕch mơdro hăm tơdrong jang tŏk kơ teh đak. 

Kơdră Quốc hội pơma hơdăh, Tơdrong tơchơ̆t 41 đơ̆ng Anih tơm Chinh trĭ găh pơjing păng atŏk tơiung hơnăp jang đơ̆ng Khul tĕch mơdro Việt Nam lơ̆m chăl ‘nao hlôi tơlĕch đei đon tơchĕng, trong jang ‘nao, ‘moi kiơ̆ tơdrong ‘mĕh vă jang tŏk đơ̆ng khul bơngai tĕch mơdro păng tơdrong ‘mĕh vă đơ̆ng tĕh đak. Yoa thoi nŏh, atŏk tơiung anih tĕch mơdro kơ hơdrĕch hơdrung, tôch kăl atŏk tơiung khul tĕch mơdro Việt Nam đei jơhngâm đon tơpăt ‘lơ̆ng, jang xa gơ̆h, đei đon tơnăp hăm tơpôl kiơ̆ đơ̆ng tơdrong pơjing, rong jơhngâm đon rơgei ‘lơ̆ng, tưk tơiung kơjă kăp gĭt đơ̆ng sơ̆ kơ dôm unh hnam tĕch mơdro.