Hnam kơmăy chĕh phe Sơn La đei jên jang truh 260 ti, hăm kơsư̆k ot 50.000 tân plei hơdrih 1 sơnăm, hơtŏ hăm 12.500 tân chĕh phe 1 sơnăm. Hăm tơdrong ‘lơ̆ng đơ̆ng tŏ ‘mi kial, tĕh lăp hăm tơdrong choh jang xa, pơm tơlĕch lơ tơmam, dêh char Sơn La akŏm jơhngâm pơtăm ‘long xa plei, kơtao păng chĕh phe Arabica. Đơ̆ng rŏng hlŏh 30 sơnăm jang tŏk, truh dang ei đei hlŏh 20.000 ha ‘long cheh phe Arabica, iŏk đei 41,2% tĕh pơtăm chĕh phe Arabica lơ̆m tĕh đak; jĭ dêh char đei tĕh pơtăm chĕh phe Arabica xă glŏh lơ̆m tĕh đak.

Phŏ Bí thư chĕp kơ̆l đảng dêh char Sơn La Lò Minh Hùng akhan, tơdrong ăn Hnam kơmăy chĕh phe Sơn La bơ̆ jang tơ̆ apŭng Mai Sơn, dêh char Sơn La, lăp hăm trong vă jang atŏk tơiung mŭk drăm, tơpôl păng tơdrong vă sơng iŏk jên tơmât jang đơ̆ng dêh char đơ̆ng 2020-2025; jĭ tơdrong tơƀôh hơdăh ăn tơdrong jang kiơ̆, hơnhăk trong jang đơ̆ng Đảng, tơdrong tơgŭm đơ̆ng tĕh đak mât lơ̆m tơdrong arih xa; đei hơmĕng gô hơnhăk tơdrong đei yoa tih ăn bơngai tơmât jên jang, sek tơlang dôm tơdrong nol, ưh kơlăp lơ̆m tơdrong jang atŏk tơiung ‘long chĕh phe tơ̆ dêh char.