Kơdră Quốc hội Vương Đình Huệ vang truh pơm lêh hơpăh. 79 ƀai chih đei Khul châm hơlen mă hơtuch rơih vă hơpăh Tơmam Diên Hồng ‘măng mă 2, đei 7 Yaih A, 14 Yaih B, 20 Yaih C păng 38 Yaih pơčhơp jơhngâm. Dôm ƀai chih iŏk đei yaih chih tơƀôh hơdăh tơdrong arih xa, jơ hŏk hôp, ‘moi kiơ̆ dôm tơdrong jang tơm, tơblang hơdăh dôm tơdrong jang đơ̆ng Quốc hội, Jơnŭm pơgơ̆r kon pơlei jơ̆p tơring păng bơngai tang măt.

Tơmam hơpăh Diên Hồng ‘măng mă 2, Radio nơ̆r pơma Việt Nam iŏk đei 5 yaih: ‘nŏh 1 yaih A găh grŭp chih: Tuyết Mai, Lê Tuyết, Vân Hồng, Uông Huyền, Hà Thảo, Anih chih tơdrong kơtơ̆ng ang VOV1 hăm dôm ƀai: “Hơtŏk tơdrong klăih song hơnăp jang, pơjao đon lui”; 2 yaih B găh grŭp chih: Ngọc Thành, Hà Phương, Ƀao Điên tư VOV News hăm dôm ƀai “Tŏk ‘lơ̆ng đơ̆ng chih pơjing Luơ̆t păng dôm tơdrong ‘lơ̆ng hơiă tơ̆ Hnam hôp”, păng Grŭp chih tơ̆ Radio pơdăh tivi ki thuơ̆t sô̆ VTC hăm ƀai “Jơhngâm pran đơ̆ng chăl sơ̆”; 2 yaih pơčhơp jơhngâm đơ̆ng Anih chih tơdrong kơtơ̆ng ang tơ̆ tơring Tŏk bŏk păng Tơring Tây Bắc.