Tang măt ăn Ƀok pơtao păng Khul kơdră teh đak Nhật Bản, Kơdră tang măt Nhật Bản tơ̆ Việt Nam Yamada Takio hlôi pôk ăn Mê đai ‘Năr lĕch dơ̆ng mă blŭng Đại Thập tự ăn Kơdră so chĕp pơgơ̆r Kuô̆k hô̆i Nguyễn Thị Kim Ngân.

Pơma tơbăt jơhngơ̆m đon chhôk hơ iă sơng iŏk Mê đai ‘Năr lĕch dơ̆ng mă blŭng Đại Thập tự đơ̆ng Ƀok pơtao păng Khul kơdră chĕp pơgơ̆r Nhật Bản pôk ăn, Kơdră so chĕp pơgơ̆r Kuô̆k hô̆i Nguyễn Thị Kim Ngân akhan, ‘nau jing tơmam pôk hơpăh gĭt kăl hloh tơƀôh hơdăh tơdrong lăng ba, hôn bơnê đơ̆ng Nhật Bản hăm tơdrong tơgop tŏ sĕt lơ̆m bơ̆ jang kơ bơ̆n. Kơdră so chĕp pơgơ̆r Kuô̆k hô̆i Nguyễn Thị Kim Ngân hmach chơt hơ iă ăn tơdrong tơgoăt tơgoăl ‘lơ̆ng liĕm ƀar păh Việt Nam-Nhật Bản păng kon pơlei ƀar teh đak hơnơ̆ng atŏk tơ iung kơjăp ‘lơ̆ng lơ̆m đunh đai tai sơnăm kơnh.