Găh Hnam pơgang jang tơgŭm tăl 2 kơsô̆ 5 (tơplih ăn Hnam pơgang jang tơgŭm tăl 2 kơsô̆ 4) bơ̆ jang tơ̆ Nam Sudan, Hnam pơgang đei 63 ‘nu bơngai, lơ̆m nŏh đei 11 ‘nu drŏ kăn, đei rơih đơ̆ng dôm Quân khu 5, 7, 9; Quân đoàn 4; Hnam pơgang Quân y 175; Anih vei lăng tơdrong rơngei Việt Nam păng 1,2 anih jang nai. Khul linh vang jang đei pơtâp pơhrăm tôch hơlen găh rim tơdrong, đei hloi găh chinh trĭ, khul linh, jang tơgŭm ki thuơ̆t, jang pơgang, đon hlôh vao găh tơdrong vei lăng rơngei ‘moi kiơ̆ rim tơdrong tơ̆ yăn âu, pơm lăp hăm rim tơdrong hơgăt đơ̆ng LHQ păng nơ̆r athei bơ̆ jang đơ̆ng Khul jang tơgŭm.

Pơjao tơdrong tơchơ̆t, hơpăh hla kơ tĕh đak ăn khul linh vei lăng rơngei tơ̆ jơ pơm lêh năm jang, Kơdră tĕh đak pơma hơdăh, Đảng, tĕh đak ling lang lui, čhôk ‘nă hăm dôm tơdrong jang đei đơ̆ng dôm khul linh vei lăng rơngei Việt Nam khei ‘năr âu ki, atŭm hăm ‘nŏh lui, dôm khul jang mưh năm bơ̆ jang  hơnơ̆ng tơƀôh hơdăh jơhngâm đon kơtang, gơ̆h hơgei, pơm lăp hăm rim tơdrong ‘mĕh vă đơ̆ng Liên hợp quốc, tơgăl hăm tơdrong juăt đơ̆ng Ƀô đô̆i Ƀok Hô mưh bơ̆ jang vei lăng tơdrong rơngei kơ Liên hợp quốc.