Pơma tơ̆ jơ bơ̆ jang, Kơdră teh đak bơ̆n, ƀok Tô Lâm akhan, lơ̆m tơdrong tơblăh tang găn xa pơjĭp, pơm glăi, Anih dăr hơlen kon pơlei hlôi kơchăng bơ̆ jang tôch pran, kŭm hăm dôm anih jang kơpal, pơm tơplih ‘lơ̆ng tơdrong chă ƀôh păng sek tơlang tơdrong yoch xa pơjĭp, pơm glăi.

Anih jang hlôi jang hơdoi kơjăp hăm dôm anih tơkêng tơdrong yoch hơtŏk hrĕnh tơdrong sek tơlang dôm tơdrong yoch, mă loi jĭ dôm tơdrong yoch xa pơjĭp găh mŭk drăm, kơchư̆k jang tih, krê hơmơt, găh Anih pơgơ̆r jang kơ Trung ương tang găn xa pơjĭp, pơm glăi hơlen năng, pơgơ̆r jang, đei lơ tơdrong yoch tôch tih, krê hơmơt, đơ̆ng sơ̆ tam mă biơh đei; vă sek tơlang tơpăt ‘lơ̆ng bơngai pơm glăi hai, vei lăng ‘lơ̆ng tơdrong pơm tơm kơ kon bơngai hai.

Tơƀôh hơdăh hơnăp jang păng tơdrong tơgop đơ̆ng Anih dăr hơlen kon pơlei lơ̆m khei ‘năr pơjing păng jang tŏk, Kơdră teh đak lui, tơ̆ hơnăp kơnh, Anih dăr hơlen kon pơlei hơnơ̆ng đei hơyak tŏk pran hlŏh dơ̆ng, ‘lơ̆ng hlŏh dơ̆ng, tơgop gĭt kăl ăn tơdrong jang đei jơnei ‘lơ̆ng tơdrong tơchơ̆t đơ̆ng Hop akŏm mă XIII kơ Đảng, bơ̆ jang đei đon pơhnŏng hơmet ming tư phap păng pơjing, hơmet pơ ‘lơ̆ng Teh đak chĕp kơ̆l pơgơ̆r kiơ̆ khôi luơ̆t xã hội chủ nghĩa Việt Nam lơ̆m chăl ‘nao.