Tơ̆ jang bơ̆ jang, kơdră chĕp kơ̆l dôm anih tơm, anih jang kơ Trung ương tơblang hơdăh dôm tơdrong pran ‘lơ̆ng, dôm tơdrong mă dêh char Trà Vinh hlôi jang đei, atŭm hăm ‘nŏh pơma tơƀôh dôm tơdrong tam mă pran, tam mă ‘lơ̆ng oei găn trong jang tŏk đơ̆ng dêh char nhen trong nơnăm, tơproh trong chĕng hơmet tơnŏk duk đak dơsĭ păng jang unh điên kial.

Pơma pơtôch jơ bơ̆ jang, Kơdră teh đak Tô Lâm tơchĕng ‘lơ̆ng dôm tơdrong mă dêh char Trà Vinh jang đei lơ̆m khei ‘năr âu ki. Lơ̆m noh, tơdrong tơplih ming trong jang mŭk drăm ƀôh ‘lơ̆ng hơiă, jang tŏk mŭk drăm lơ̆m 6 khei blŭng sơnăm đei hlŏh 10%, lơ hlŏh tơ̆ tơring teh tơmăn đak krong Cửu Long păng dơ̆ng mă 6 lơ̆m teh đak.

Mă loi, lơ̆m tơdrong pơjing tơring tơrang ‘nao, Trà Vinh đei đĭ đăng 85 xăh jang kĕh đang tơdrong pơjing tơring tơrang ‘nao. Kơdră teh đak hơpơi ‘mĕh, Khul kơdră teh đak, Thủ tướng teh đak, dôm anih tơm hơnơ̆ng tơgŭm, jăh hơmet pơ ‘lơ̆ng dôm tơdrong pơmat tat, tơhlăk tăk, pơjing tơdrong ‘lơ̆ng hlŏh ăn dêh char Trà Vinh jang tŏk tơ̆ hơnăp kơnh.