Sơng iŏk nơ̆r krao đơ̆ng Kơdră teh đak bơ̆n, ƀok Tô Lâm, Kơdră tơm teh đak Cộng hòa Dân chủ Timor Leste José Ramos-Horta hlôi truh tơ̆ Hà Nội, pơtơm năm hơpong tơ̆ teh đak Việt Nam đơ̆ng ‘năr 31/7 truh ‘năr 3/8/2024. Pơgê ‘năr 1/8, tơ̆ Anih jang kơ ƀok Kơdră teh đak, Kơdră teh đak bơ̆n, ƀok Tô Lâm pơgơ̆r lêh sơng Kơdră tơm teh đak Cộng hòa Dân chủ Timor Leste truh hơpong tơ̆ teh đak Việt Nam.

‘Măng năm hơpong tơ̆ teh đak Việt Nam đơ̆ng Kơdră tơm teh đak Timor Leste tôch gĭt kăl vang tơgop hơmet kơjăp đon lui chinh trĭ, hơdai hăm ‘nŏh jĭ jơnăr vă 2 păh hơnơ̆ng pơma nuh găh dôm trong jang pơm hơtŏk tơdrong jang hơdoi, pơm pơ ‘lơ̆ng hlŏh dơ̆ng tơdrong pơvei 2 pang, kiơ̆ đơ̆ng noh hơmet kơjăp tơdrong pơvei ‘lơ̆ng hơiă đơ̆ng sơ̆ hlôi đei tưk tơiung hơnơ̆ng lơ̆m khei ‘năr âu ki. Đơ̆ng rŏng kơ lêh sơng, 2 ‘nu ƀok kơdră chĕp kơ̆l khul jang kơ 2 teh đak pơgơ̆r pơma đam, hơlen năng dôm tơdrong iŏk đei đơ̆ng jang hơdoi kơplăh 2 teh đak khei ‘năr âu ki păng tơlĕch dôm tơdrong vă jang hơdoi tơ̆ hơnăp kơnh. 2 ‘nu kơdră chĕp kơ̆l oei dơ̆ng lăng lêh kĭ pơkăp păng pơjao ăn băl hla ar jang hơdoi đơ̆ng 2 teh đak.