Sơng iŏk nơ̆r krao hơvơn đơ̆ng Tổng Bí thư Nguyễn Phú Trọng, Kơdră tơm teh đak Nga Vladimir Putin năm hơpong tơ̆ teh đak Việt Nam. ‘Năr dơ̆ng ‘năr 20/6, Lêh sơng Kơdră tơm teh đak Nga Vladimir Putin đei pơgơ̆r tih tơ̆ Anih jang kơ ƀok Kơdră teh đak kiơ̆ tơdrong lêh ‘măn ăn Kơdră chĕp kơ̆l teh đak, Ƀok Kơdră Tô Lâm pơgơ̆r lêh sơng âu.

Đơ̆ng rŏng kơ lêh sơng, Ƀok Kơdră Tô Lâm păng Kơdră tơm teh đak Nga Vladimir Putin chĕp kơ̆l khul tang măt ăn 2 teh đak pơgơ̆r pơma đam. Sơnăm 2024, Việt Nam păng Nga tơbăt 30 sơnăm kĭ pơkăp Tơdrong hơgăt găh dôm tơdrong tơm lơ̆m tơdrong pơvei jang tơbôl păng 12 sơnăm pơjing tơdrong pơvei jang hơdoi gĭt kăl tôm tơdrong. Sơnăm 2025 kŭm jing 1 sơnăm tôch gĭt kăl mưh Việt Nam păng Nga tơbăt 75 sơnăm pơjing pơvei jang tơbôl.

‘Nâu jĭ dôm khei ‘năr gĭt kăl vă 2 teh đak kŭm hăm băl hơlen năng dơ̆ng, pôk pơ ư dôm tơdrong jơnei đơ̆ng jang hơdoi adrol sơ̆, atŭm hăm ‘nŏh pơjing trong yak hơdoi, vang jang atŏk tơiung tơ̆ hơnăp kơnh. ‘Măng năm hơpong đơ̆ng Kơdră tơm Putin ‘măng mă âu tơbăt tơdrong jang tơbôl gĭt kăl đơ̆ng 2 teh đak, vang tơgop pơm pơ ‘lơ̆ng hlŏh dơ̆ng tơdrong pơvei jang hơdoi gĭt kăl tôm tơdrong đơ̆ng 2 teh đak, tơgop ăn tơdrong rơngei, jang hơdoi păng atŏk tơiung tơ̆ tơring păng lơ̆m apŭng plenh teh.