Đơ̆ng rŏng kơ lêh sơng, Kơdră teh đak Tô Lâm kŭm hăm Tổng Bí thư, Kơdră teh đak Lào chĕp kơ̆l khul tang măt ăn 2 teh đak pơgơ̆r pơma đam. 2 ‘nu ƀok kơdră pơma dơ̆ng trong jang ưh đei tơplih đơ̆ng 2 teh đak ‘nŏh ling lang năng kăl păng tơgŭm dêh hlŏh ăn tơdrong hơmet kơjăp, pơm pơ ‘lơ̆ng tơdrong pơvei, mât 1 ƀơ̆r đon păng jang hơdoi tôm tơdrong đơ̆ng Việt Nam -Lào; hơnơ̆ng tơlĕch jang đei yoa dôm tơdrong drơ̆ng nơ̆r đơ̆ng 2 teh đak, kŭm nhen đơ̆ng dôm anih tơm, anih jang kơpal tơ̆ trung ương păng tơring;

Hơtŏk tơdrong pơma nuh găh dôm tơdrong gĭt kăl; hơtŏk tơdrong năm hơpong, tơƀâp băl ăn kuan tih păng khul jang kơpal; hơlen năng păng pơm pơ ‘lơ̆ng dôm trong jang hơdoi; hơtŏk tơdrong tơroi tơbăt, pơtho tơƀôh găh tơdrong pơvei ‘lơ̆ng hơiă gĭt kăl đơ̆ng sơ̆ kơ Việt Nam -Lào ăn kon pơlei 2 teh đak. Kơdră teh đak Tô Lâm pơma hơdăh, kiơ̆ jơhngâm đon năng băl nhen ‘nhŏng oh, boăl juăt, Việt Nam đĭ jơhngâm vă tơgŭm ăn Lào iŏk jang đang ‘lơ̆ng hơnăp jang gĭt kăl lơ̆m apŭng plenh teh sơnăm 2024, lơ̆m noh đei hơnăp jang pơm Kơdră ASEAN păng Kơdră AIPA.