Tơ̆ jơ sơng, Kơdră teh đak bơ̆n, ƀok Tô Lâm pơma hơdăh, Đảng, teh đak păng kon pơlei Việt Nam tôch năng kăl tơdrong pơvei gĭt kăl ‘lơ̆ng hơiă đơ̆ng sơ̆, jĭ boăl juăt hai, jĭ ‘nhŏng oh hai hăm teh đak Cuba; tơƀôh đon hơiă mưh tơdrong pơvei jang hơdoi gĭt kăl đơ̆ng 2 teh đak hơnơ̆ng đei hơmet kơjăp păng đei lơ hơyak tŏk pran ‘lơ̆ng, tôm tơdrong ƀât mă apŭng plenh teh oei tơplih tôch krê hrei ‘nâu.

Vă hơnơ̆ng hơtŏk tơdrong pơvei jang hơdoi tôm tơdrong đơ̆ng Việt Nam păng Cuba, Kơdră teh đak athei 2 păh vei kơjăp tơdrong ăn khul năm ngôi tơ̆ băl, pơgơ̆r tơƀâp tih; jang hơdoi kơjăp, tơlĕch jang đei yoa ‘lơ̆ng dôm tơdrong drơ̆ng nơ̆r, dôm trong jang hơdoi hlôi đei vă hơnhăk tơdrong pơvei gĭt kăl Việt Nam-Cuba tŏk roi ‘lơ̆ng păng đei yoa hlŏh dơ̆ng. Pơma truh tơdrong jang hơdoi 2 pang, Kơdră teh đak hơpơi ‘mĕh 2 păh tơlĕch jang đei yoa ‘lơ̆ng dôm tơdrong jang hơdoi găh choh jang xa, hơtŏk tơdrong pơvei găh mŭk drăm, tĕch mơdro, tơmât jên jang đơ̆ng 2 pang, kŭm nhen pơih xă hlŏh dơ̆ng truh dôm tơdrong jang nai mă 2 păh đei tơdrong ‘lơ̆ng.