Kơdră teh đak Tô Lâm hơiă hăm Bơngai tang măt Kohdayar Marri đei pôk pơm Bơngai tang măt tôm tơdrong kơ teh đak Pakistan tơ̆ Việt Nam. Kơdră teh đak pơma hơdăh, Việt Nam năng kăl tơdrong pơvei hăm Pakistan, 1 teh đak đei anih dơ̆ng găh chinh trĭ tôch gĭt kăl tơ̆ tơring Ấn Độ Dương - Thái Bình Dương; lui Pakistan gô đei lơ tơdrong tơgop ‘lơ̆ng ăn tơdrong rơngei, hiôk sơđơ̆ng tơ̆ tơring. 

Sơng bơngai tang măt ăn teh đak Mozambique Ilundi Dos Santos, Kơdră teh đak Tô Lâm pơma hơdăh Việt Nam ling lang năng kăl păng hơpơi ‘mĕh hơtŏk hlŏh dơ̆ng tơdrong pơvei ‘lơ̆ng đơ̆ng sơ̆ hăm Mozambique, 1 lơ̆m dôm teh đak jang hơdoi tơm đơ̆ng Việt Nam tơ̆ châu Phi. Sơng bơngai tang măt ăn Timor-Leste Leste João pereira, Kơdră teh đak Tô Lâm akhan, mă đơ̆ng jên tĕch mơdro 2 păh oei ưh kơ lơ, mă lei tơdrong ‘lơ̆ng vă jang hơdoi đơ̆ng 2 teh đak oei tôch lơ, lơ̆m noh đei jang hơdoi găh choh jang xa, kơmăy viễn thông, pơtho pơhrăm, jang đak dâu... Kơdră teh đak athei Bơngai tang măt lơ̆m jăl jang đơ̆ng kơdih vang jang hơdoi ‘lơ̆ng hăm dôm anih tơm, anih jang kơpal kơ Việt Nam hơtŏk hlŏh dơ̆ng tơdrong pơvei đơ̆ng 2 teh đak.