Pơgê brei (25/7), Kơdră teh đak Tô Lâm sơng Kơdră vei lăng Đảng Kon pơlei Campuchia CPP, Kơdră Thượng viện Campuchia Hun Sen, Thủ tướng Hàn Quốc Han Duck Soo, Kơdră vei lăng Khul linh so păng bơngai đei kŏng teh đak Algeria Laid Rebiga, Kơdră jang tơgŭm găh tơdrong sơđơ̆ng teh đak Ấn Độ Ajit Doval. Tơ̆ dôm ‘măng tơƀâp, kơdră chĕp kơ̆l dôm teh đak tơƀôh jơhngâm đon ơh sơ ‘ngon tôch ai hăm tơdrong lôch răm đơ̆ng Tổng Bí thư Nguyễn Phú Trọng, pơtruh nơ̆r jet gia, pơma nuh păng nơ̆r sơ ‘ngon hlŏh hăm Kơdră teh đak Tô Lâm, Kơdră chĕp kơ̆l Đảng, Teh đak păng kon pơlei Việt Nam.

Kơdră chĕp kơ̆l dôm teh đak bơnê tơdrong tơgŭm tôch kăp gĭt păng dôm tơdrong tơgop gĭt kăl đơ̆ng Tổng Bí thư Nguyễn Phú Trọng ăn tơdrong pơvei 2 pang đơ̆ng Việt Nam păng dôm teh đak; lui Kơdră teh đak Tô Lâm păng Kơdră chĕp kơ̆l teh đak Việt Nam hơnhăk teh đak Việt Nam hơnơ̆ng yak tŏk, ‘moi kiơ̆ dôm kơjă kăp gĭt mă Tổng Bí thư Nguyễn Phú Trọng hlôi ‘măn ăn. Kơdră teh đak Tô Lâm pơtruh nơ̆r bơnê hăm teh đak, Khul kơdră teh đak, Quốc hội, kon pơlei păng kơdră chĕp kơ̆l dôm teh đak hlôi ‘măn jơhngâm đon ‘lơ̆ng hơiă hăm Tổng Bí thư Nguyễn Phú Trọng, kŭm nhen vang yak hơdoi hăm Kơdră chĕp kơ̆l păng kon pơlei Việt Nam lơ̆m jơnăr tôch ơh sơ ‘ngon âu, tơƀôh hơdăh tơdrong pơvei tôch ‘lơ̆ng đơ̆ng Việt Nam hăm dôm teh đak.