Tơ̆ jơ tơƀơ̆p, 2 kơdră chĕp kơ̆l tơƀôh đon chhôk hơiă găh dôm jơnei gĭt kăl lơ̆m jang hơdai 2 pang khei ‘năr âu ki nhen pơvei pơma dơnuh khŭl kơdră kơpal păng dôm kơdră, tŭn pran dôm tơdrong jang hơdai mŭk drăm - mơdro sa - khŭl linh - vei sơđơ̆ng, khoa hŏk - kơmăy kơmŏk, pơtho pơhrăm, ŭnh hơyuh, tơƀơ̆p kon pơlei. Ƀok Võ Văn Thưởng lăng ‘lơ̆ng păng bơnê kơ ƀok Putin, dôm anih jang chĕp kơ̆l, tơring tơ̆ Nga hlôi hơdrin ming man rup ƀok Hồ tơ̆ Saint Petersburg.

Kơdră teh đak ‘meh vă Nga hơnơ̆ng asong hŏk ƀŏng ăn kơ sinh viên Việt Nam truh hŏk pơhrăm tơ̆ Nga kŭm nhen hơtŏk loi dơ̆ng pơgơ̆r joh ayŏ, tơƀơ̆p pơma dơnuh hăm kon pơlei. Ƀok Vladimir Putin pơma hơdăh Việt Nam jĭ 1 lơ̆m dôm teh đak jang hơdai gĭt kăl hloh kơ Nga tơ̆ tơring châu Á-Thái Bình Dương, hơnơ̆ng hơtŏk dôm trong jang tơgŭm, jang hơdai mơdro sa, tơmơ̆t jên jang 2 pang păng lơ pang, hơtŏk loi dơ̆ng jang hơdai đơ̆ng dôm anih tơm, anih jang, tơring đơ̆ng 2 teh đak.