Tơ̆ jơ lêh, Kơdră teh đak bơ̆n Võ Văn Thưởng bơnê kơ Măt trâ̆n tôh kuôk Việt Nam, Anih tơm Asong jang Việt Nam păng Anih jang ‘Long pơglang brê Việt Nam lơ̆m dôm sơnăm kơ âu hlôi jang atŭm hăm dôm tơring, đei lơ tơdrong jang tơnăp truh dôm tơring ataih yaih lơ̆m jâ̆p teh đak vă pơgơ̆r dôm tơdrong jang tơgŭm kon pơlei.

   Lơ̆m Akŏm "Têt ‘mêm kơ-eng" đei pơgơ̆r tơ̆ xah Thanh Thủy, apŭng Thanh Chương, đei lơ anih akŏm kơchơ Têt hăm dôm tơmam drăm kăl asong ăn kon pơlei. Hloh 20 tih hlj, 6.000 tơnuh unh mong unh hơyuh, minh tơnuh unh pai xa ƀan trŭ mâm non, minh pôm hnam ‘long pơglang brê păng lơ tơpu tơmam hlôi đei asong ăn dôm tơring, unh hnam mă teh đak tơchơ̆t tơgŭm, unh hnam hin dơnuh, bơngai jang tơnap tap. Asong tơpu tơmam păng nơ̆r pơtruh thơ thâu hơ-iă sơnăm ‘nao hăm kon pơlei, Kơdră teh đak hơpơi ‘meh kon pơlei gô pơtoi hơtŏk tơdrong juăt jue joh ayŏ kơ hơdrung hơdrĕch noh tơguăt tơguăl, ‘mêm kơ-eng, vang tơgŭm dih băl, atŭm băl pơjing tơdrong hơrih roi năr roi đei ƀôh hloh, mă kăl Nghệ An dah hrôih tơpă jing minh dêh char đei ƀôh ƀiơ̆ ƀơ̆t pă đei unh hnam yơ hin dơnuh.