Đơ̆ng rŏng tơmơ̆ng đe kơdră kơ dôm anih jang pơtruh nơ̆r tơblang hơdah dôm nơ̆r pơtruh đơ̆ng tơring, Kơdră teh đak bơ̆n Tô Lâm ră hơdah, Cao Bằng jing tơring đei anih dơ̆ng kăp gĭt, jing tơring “dơnơm” kơ teh đak, jing “ ‘măng mơ̆t lĕch” gah pơmơ̆t păng gah tu kơ teh đak, đei lơ cham char plenh teh ‘lơ̆ng rŏ, bri kơdrơ̆ng să seng; đei 27 hơdrung bơngai kon kông hơrih jang xa hăm lơ tơdrong joh ayŏ ‘lơ̆ng hơ-iă.

Vă jang đei jơnei sơnong jang lơ̆m khei năr truh, Kơdră teh đak pơkăl Cao Bằng kăl drơ̆ng minh, pơm jang tơnăp; tơ-iung pran tơdrong hơpơi ‘meh hơtŏk tơ-iung, tơdrong tơguăt tơguăl, pơ-ư pơ-ang tơdrong ‘lơ̆ng kơ hơdrung hơdrĕch; iŏk jang tơnăp jơhngơ̆m pran lơ̆m tơpôl, tơdrong juăt jue, joh ayŏ, kon bơngai kơ tơring teh “tơm dơnơm kăch mang”; ưh đei gơnơm đe chă tơgŭm, mă kơdih hơdrin pơm jang đei jơnei sơkơ̆t hơtŏk mŭk drăm tơpôl jăl sơnăm 2021-2025.