Tơ̆ jơ sơng, Kơdră teh đak bơ̆n Tô Lâm chơt hơ-iă ‘măng mă blŭng đei tơƀơ̆p đe Kơdră jang tang măt ăn EU hăm kơchư̆k jang ‘nao; hmach bơnê kơ dôm nơ̆r thơ thâu ‘lơ̆ng đơ̆ng đe kơdră kơpal EU păng dôm teh đak vang jang păng đe Kơdră tang măt. Kơdră teh đak bơ̆n sơkơ̆t hơdah EU păng dôm teh đak vang jang jing dôm tơring jang hadoi kăp gĭt kơ Việt Nam; hơpơi ‘meh rim Kơdră jang tang măt gô hơnơ̆ng jing gơng tơroh kăp gĭt, tơgop lơ hloh lơ̆m tơdrong hơtŏk jang tơbôl, jang hadoi tôm tơdrong đơ̆ng Việt Nam hăm EU păng dôm teh đak vang jang lơ̆m khei năr truh, tơgop dah hrôih hơ-‘nhăk tơbôl jang hadoi Việt Nam-EU hơtŏk minh hơyak ‘nao.

Kơdră teh đak bơ̆n adoi pơkăl rim Kơdră jang tang măt pơtoi akŏm pơma đam đe kơdră kơpal păng đei nơ̆r pơma vă pơtrŭt dôm teh đak EU tam mă kĭ Tơchơ̆t Vei vêr asong jang Việt Nam-EU (EVIPA) dah hrôih kĭ Tơchơ̆t păng Anih jang Châu Âu (EC) dah hrôih yuih lê̆ theh dreng IUU hăm ka hơdang Việt Nam tĕch ăn teh đak đe, tơgŭm Việt Nam hơtŏk jang mŭk drăm đak dơsĭ, jang rong ka hơdang kơjăp sơđơ̆ng hloh.