Kơdră teh đak bơ̆n sơkơ̆t hơdah Việt Nam hơnơ̆ng pơkăp Nga jĭ minh lơ̆m dôm teh đak kăp gĭt lơ̆m tơdrong jang tơbôl kơ po, hơnơ̆ng hơlen tơdrong pơm jang păng tơgŭm Nga hơtŏk tơ-iung sơđơ̆ng. Đảng, Teh đak păng kon pơlei Việt Nam hơnơ̆ng ƀlŏk hơdơ̆r tơdrong tơgŭm tih tên, dăp đon dăp bơnôh mă kon pơlei Liên Xô păng kon pơlei Nga hlôi ‘măn ăn Việt Nam lơ̆m tơdrong iung tơjră pơjei iŏk tơdrong rơngei hiôk hian kơ teh đak hơdrol ki, adoi nhen tơdrong tơplih ‘nao, tơ-iung pơjing păng vei lăng teh đak hrei âu.

Kơdră teh đak bơ̆n Tô Lâm hmach bơnê kơ tơdrong hơtŏk tơ-iung tơnăp lơ̆m jang tơbôl juăt jue păng Jang tôm tơdrong đơ̆ng Việt Nam păng Nga khei năr âu ki lơ̆m tôm tơdrong jang hadoi, chơt hơ-iă hăm tơdrong mă tơmam drăm tĕch răt kơ 2 pah lơ̆m khei năr âu ki ƀôh hơtŏk hơdah. Ƀar pah adoi oei đei lơ trong hiôk vă hơtŏk jang hadoi, mă kăl lơ̆m dôm tơdrong jang mŭk drăm – tĕch pơdro – asong jang, ming man anih jang, trong nơnăm, tơmang pơhiơ̆ păng akŏm tơmang kon pơlei.