Kơdră teh đak bơ̆n Tô Lâm thơ thâu hơ-iă hăm Yă Kơdră jang tang măt đei jăl jang tơnăp tơ̆ Việt Nam; Bơnê kơ Yă Kơdră tang măt hlôi tơgop kăp gĭt lơ̆m tơdrong hơtŏk jang tơbôl Việt Nam-Thuỵ Điển. Kơdră teh đak ră hơdah, Teh đak, Jơnŭm pơgơ̆r teh đak păng kon pơlei Việt Nam ưh layơ hiơt păng hơnơ̆ng tơgĭt tơdrong tơbôl, tơdrong tơgŭm kăp gĭt, đon bơnôh tơguăt tơguăl mă Jơnŭm pơgơ̆r teh đak păng kon pơlei Thụy Điển hlôi ‘măn ăn Việt Nam lơ̆m tơdrong iung tơjră vă đei jơnei rơngei hiôk hian hơdrol ki păng lơ̆m khei năr hơtŏk tơ-iung teh đak hrei âu.

Kơdră teh đak bơ̆n hmach bơnê kơ dôm anih jang mŭk drăm Thụy Điển hơtŏk asong jang tơ̆ Việt Nam lơ̆m dôm tơdrong jang mă Thụy Điển pran nhen ming man anih jang, trong nơnăm, unh hơyuh ‘lơ̆ng, pơkăp tơring kơdrơ̆m, hơtŏk tơ-iung kơjăp sơđơ̆ng...