Vă jê̆ 400 bơngai đei pôk hơnăn NSND, NSƯT, lơ̆m lơ tơdrong nhen: tơdra hơri, pơm phim, hơsuang, pơre nơ̆r – pơdah tivi, pơm tông. Kơdră teh đak bơ̆n Võ Văn Thưởng năm akŏm, iung pơma păng pôk hơnăn Ngê̆ sih Nhân dân ăn dôm bơngai đei hơnăn.

Pơma ah lêh akŏm, Kơdră teh đak bơ̆n Võ Văn Thưởng tang măt ăn kơdră Đảng, Jơnŭm pơgơ̆r teh đak pơtruh nơ̆r thơ thâu hơ-iă ‘lơ̆ng rŏ hăm rim bơngai đei hơnăn pôk ‘măng mă âu, dôm bơngai hlôi pơm jang sơ̆n jơhngơ̆m, gơh hơgei păng đei lơ tơdrong tơgop ang hơdah ăn tơdrong jang joh ayŏ kơdŏ suang kơ teh đak.

Kơdră teh đak lui ngeh, rim hnưr bơngai jang joh ayŏ pơtoi băl jang tơnăp hăm tơdong gơh hơgei păng đon bơnôh băt ‘mêm kơ teh đak, tơguăt kơjăp hăm kon pơlei, hăm tơdrong jang tơplih ‘nao kơyuơ Đảng pơgơ̆r, khul jang joh ayŏ teh đak bơ̆n gô pơjing đei lơ tak phâm ‘lơ̆ng, đei kơjă kăp gĭt gah đon bơnôh păng joh ayŏ, sơkơ̆t kơ hnưr hơrih, pơjing tơdrong kăl lơ̆m tơpôl, tơgop tih tên hloh dơ̆ng ăn tơdrong hơtŏk jang kơ hơdrung hơdrĕch.