Tơroi gah tơdrong đei iŏk đơ̆ng ‘măng năm tơmang Hnam Khop tơm Vatican, Kơdră teh đak bơ̆n ăn tơbăt, hlôi pơma đam hăm ƀok Papa Francis, bơ̆ jang hăm Thủ tướng Hnam Khop tơm – Ƀok soi tih Pietro Parolin, đei kon pơlei kiơ̆ khop Băyang jâ̆p teh đak tơrĕk truh. Tơdrong pơma đam đơ̆ng Kơdră teh đak Võ Văn Thưởng păng Ƀok Papa Francis pơdui đunh hloh pơtêng hăm tơchơ̆t. Ƀok Papa adoi drơ̆ng nơ̆r hăm tôm kon pơlei kiơ̆ khop Việt Nam. 

Ƀok soi tih Nguyễn Năng sơkơ̆t hơdah, kon pơlei kiơ̆ khop Băyang hơnơ̆ng hơrih trŏ kiơ̆ êbiang, pơm kiơ̆ nơ̆r hơvơn đơ̆ng Tơring khop, Ƀok soi, pơm jang ăn tơpôl păng teh đak; Kon khop adoi hơpơi ‘meh vang jang lơ hloh lơ̆m tơdrong pơtho pơhrăm, jang gah pơgang hơmet jĭ jăn, jang pơyua ăn kon pơlei, kiơ̆ đơ̆ng noh tơgop lơ hloh dơ̆ng ăn tơpôl ăn kon pơlei.