Lơ̆m tơdrong tơpăt jue, tơbôl tơnăp, ƀar ƀok Kơdră hlôi tơroi hăm dih băl băt tơdrong đei kơ rim teh đak, pơma đam gah dôm tơchơ̆t jang hadoi vă hơtŏk pran hloh dơ̆ng tơbôl juăt jue păng jang hadoi lơ tơdrong đơ̆ng Việt Nam păng teh đak Áo.

Kơdră teh đak bơ̆n Võ Văn Thưởng pơkăl 2 păh athei pơtoi jang hadoi kơjăp, iŏk yua dôm tơdrong 'lơ̆ng đơ̆ng Tơchơ̆t Tĕch pơdro hiôk hian Việt Nam – EU (EVFTA); lơ̆m noh tơdrong hơlen pơm trong hiôk ăn dôm tơmam tĕch ăn teh đak đe kơ rim teh đak gơh hiôk hian hloh; teh đak Áo tơchơ̆t pơm trong hiôk ăn anih jang mŭk drăm Áo hơtŏk asong jang tơ̆ Việt Nam lơ̆m dôm tơdrong jang kŏng ngĭp pơm tơlĕch gre hơyuh, trong gre treng, kơmăi kơmŏk hơmet jĭ jăn, pơm tơlĕch pơgang... Ƀar păh drơ̆ng nơ̆r hơtŏk dôm tơdrong jang hadoi gah pơtho – pơhrăm, joh ayŏ kơdŏ suang , tơplŏng kơdâu, hơtŏk pran dôm tơdrong akŏm tơroh kon pơlei.  

Đơ̆ng rŏng kơ pơma đam, Kơdră teh đak bơ̆n Võ Văn Thưởng păng Kơdră teh đak Áo hlôi bơ̆ng pang Lêh kĭ Hla bar tơbăt đơ̆ng Anih tơm jang Tơbôl Việt Nam păng Anih tơm jang Tơbôl Áo.