Tơ̆ jơ pơma đam, 2 pah atŭm thơ thâu kơ dôm tơdrong jang đei jơnei tih tên kơ rim Đảng, rim teh đak jang đei lơ̆m tơdrong tơ-iung pơjing chuh ngia xah hô̆i, hơ-‘nhăk tơdrong phĭ tơtŏ dơnŏ ‘lơ̆ng ăn kon pơlei. Kơdră teh đak bơ̆n Võ Văn Thưởng  ră hơdah, hơtŏk jang tơbôl hăm Trung Quốc hơnơ̆ng jing tơdrong jang blŭng a lơ̆m tơchơ̆t jang tơbôl kơ Việt Nam.

Tổng Bí thư, Kơdră teh đak Tập Cận Bình sơkơ̆t hơdah Trung Quốc hơnơ̆ng lăng Việt Nam đei anih dơ̆ng kăp gĭt, jing trong jang hơlâu lơ̆m tơchơ̆t jang tơbôl hăm teh đak tơjê̆ kơ Trung Quốc. Ră hơdah tơdrong kăp gĭt lơ̆m hơtŏk hlôh vao, lui ngeh đơ̆ng kon pơlei 2 teh đak, 2 jơnŭm pơgơ̆r, pơkăl 2 pah hơtŏk akŏm kon pơlei 2 teh đak, mă kăl noh hăm đe mơlôh, hơtŏk tơroi tơbăt gah juăt jue tơbôl ‘lơ̆ng rŏ kơ 2 pah. Atŭm năr, Thủ tướng teh đak bơ̆n Phạm Minh Chính, Kơdră Kuôk hô̆i Vương Đình Huệ adoi pơma đam hăm Tổng Bí thư, kơdră teh đak Tập Cận Bình.