Lơ̆m kơthơ đei chih: “Trung thu ‘noh Têt kơ đe hơ-ioh. Rim ‘măng Trung thu, đe hơ-ioh đei atŭm băl pơchơt, atŭm hăm mĕ ƀă, yă ƀok akŏm tơƀang lăng măt khei, atŭm băt jơhngơ̆m đon ‘nhŏng oh, akŏm đon wơch hlăng ‘lơ̆ng kơ đe hơ-ioh.

Trung thu adoi jing Têt ‘mêm kơ-eng păng vang tơgŭm, jing ‘măng vă bơngai ‘lŏ kơdih tơbăt po athei tơrĕk hloh ăn đe hơ-ioh hăm đon bơnôh kăp gĭt. Mă kăl noh tơrĕk truh đe mon đei tơdrong hơrih tơnap tap, đe mon pơti, đe mon tơ̆ tơring hơtaih yaih, tơring sơlam teh, achon đak dơsĭ... vă rim đe hơ-ioh gơh đei sơng Têt Trung thu tôm tong păng sô̆ sôn, đei hŏk pơhrăm, gơh hơgei păng pơchơt lơ̆m tơdrong ‘mêm băt đơ̆ng unh hnam, tơpôl. Inh sô̆ lơ̆m jơhngơ̆m kơlih lơ̆m khei năr âu ki đei mon đei lơ tơdrong hơgei, jang đei lơ tơdrong ‘lơ̆ng, lui ngua kơ mĕ ƀă, yă ƀok, băt chă tơgŭm hăm dôm bơngai tơnap tap hloh kơ po. Inh hơpơi ‘meh đe mon hơnơ̆ng rong răk dôm tơdrong hơpơi ‘meh ‘lơ̆ng rŏ, băt kơ unh hnam, băt phep ngua, băt tơguăt tơguăl, tơgŭm dih băl, pơlong pơm jang kơ rơbâu tơdrong jang ‘lơ̆ng, tơgăl jing kon nguan, hŏk tro hơgei, kon sâu Ƀok Hô chu ngua!”

Pơgê năr 27/9, Kơ iĕng Kơdră chĕp pơgơ̆r Teh đak, Kơdră chĕp pơgơ̆r Khul Chĕp pơgơ̆r Hơnih mong jên Tơgum djru hơ-ioh Việt Nam Võ Thị Ánh Xuân năm ngôi, pôk tơmam drăm ăn đe hơ ioh tơ̆ Hơnih Tơgŭm djru Tơpôl dêh char Đak Lăk.

Tơ̆ au, Kơ iĕng Kơdră chĕp pơgơ̆r Teh đak Võ Thị Ánh Xuân hlôi apĭnh jet gia pơma dơnuh păng pôk tơmam drăm ‘nŏh ƀĕng trung thu ăn rim hơ ioh păng pôk ăn 50 triu hlak jên ăn Hơnih Tơgŭm djru tơpôl dêh char Đak Lăk vă vang tơgop tơgŭm djru rim đe hơ ioh tơnap tap tŏk bŏk hơrih păng hŏk pơhrăm tơ̆ hơnih au. Kơ iĕng Kơdră chĕp pơgơ̆r Teh đak Võ Thị Ánh Xuân hôn bơnê dôm tơdrong iŏk đei jơnei kơ khul kang ƀô̆, khul bơ̆ jang kơ Hơnih Tơgŭm djru tơpôl dêh char Đak Lăk lơ̆m khei năr au ki. Dôm tơdrong jang đơ̆ng hơnih au hlôi tơgop sơkơ̆t hơdăh trong bơ̆ jang trŏ ƀlep găh vei lăng năng tông tơdrong hơrih sa tơpôl đơ̆ng Đảng, Teh đak lơ̆m vei lăng năng tông bơngai kră hơdro po, hơ ioh mơti mơtĕk, jo jăn đe prăh prang hơchăng hŭt.