Kơdră teh đak bơ̆n Võ Văn Thưởng sơkơ̆t hơdah, Kơdră tang măt hlôi tơgop kăp gĭt lơ̆m tơdrong hơtŏk tơbôl đơ̆ng Việt Nam păng Nigeria, thơ thâu hăm teh đak Nigeria đei jơnei gah tơdrong jang mŭk drăm tơpôl kăp gĭt lơ̆m khei năr âu ki. Gah jang hadoi 2 pah, Kơdră teh đak bơ̆n Võ Văn Thưởng bơnê kơ tơdrong jang hadoi đei jơnei đơ̆ng Nigeria păng Việt Nam lơ̆m khei năr âu ki, mă kăl noh dôm tơdrong jang hadoi gah hơtŏk mŭk drăm – tơpôl.

Sơkơ̆t hơdah Việt Nam pơm kiơ̆ tơnăp trong jang tơbôl hiôk hian, jang hadoi atŭm hơtŏk tơ-iung, jang tơbôl lơ tơdrong; jing boăl juăt, jing teh đak vang jang lui ngeh, tơnăp hăm sơnong jang lơ̆m apŭng plenh teh, Kơdră teh đak bơ̆n ăn tơbăt, Việt Nam hơpơi 'meh hơtŏk hloh dơ̆ng tơdrong jang tơbôl hăm Nigeria lơ̆m rim tơdrong jang. Ƀar pah kăl hơtŏk pơma đam, asong khul kơpal năm tơmang dih băl; hơtŏk hloh dơ̆ng jang hadoi đơ̆ng dôm anih jang tơm, rim tơring; pơtoi pơma đam jang hadoi hăm dôm tơdrong đei ƀôh lơ̆m tơring păng lơ̆m apŭng plenh teh.