Tơ̆ jơ sơng, ƀok Kơdră tang măt Yerlan Baizhanov tơroi gah đon bơnôh kăp gĭt hăm teh đak păng kon bơngai Việt Nam; atŭm hăm noh ăn tơbăt, lơ̆m jăl pơm jang, hlôi iŏk đei tơdrong tơgŭm, jang hadoi đơ̆ng Anih tơm jang Tơbôl păng dôm anih jang kơpal kơ teh đak Việt Nam.  

Kơdră teh đak bơ̆n ră hơdah, Việt Nam păng Kazakhstan đei lơ tơdrong nhen băl gah jơhngơr hơrih, joh ayŏ; atŭm găn ga lơ tơnap tap kơyuơ tơdrong tơblah pơrơngei hơdrung hơdrĕch kơ rim teh đak khei năr adrol ki păng dang ei, 2 teh đak jing boăl juăt tơnăp hăm dih băl. Kơdră teh đak bơ̆n lui ngeh, hăm lơ tơdrong kăp gĭt gah joh ayŏ, teh đak, kon bơngai Việt Nam, hăm kơchư̆k jang yơ, ƀok Kơdră tang măt Yerlan Baizhanov adoi băt 'mêm kơ teh đak Việt Nam, hơnơ̆ng jing boăl juăt kăp gĭt, hơnơ̆ng tơgop lơ̆m tơdrong jang tơbôl juăt jue kơ Việt Nam păng Kazakhstan.