Kơdră teh đak Võ Văn Thưởng vang truh akŏm păng pơma tơ̆ jơ pơgơ̆r. Tơdrong jang đei pơih trực tuyến lơ̆m dôm trang tơpôl kơ Trung ương Đoàn, Jơnŭm Khŭl Trung ương, iŏk yua “Hơdruh tơdăm Việt Nam” păng đei tơgoăt trực tuyến hăm 14 hơnih pơih pơdăh tivi tơ̆ dôm dêh char, pơlei tơm ‘noh Hà Giang, Hà Nội, Lào Cai, Ninh Bình, Hải Phòng, Quảng Ninh, Hà Tĩnh, Dak Lak, Lâm Đồng, Đồng Nai, Bình Dương, pơlei tơm Hồ Chí Minh, Bến Tre, Kiên Giang. Hơdrô̆ tơ̆ hơnih pơih tivi tơm Bình Phước đei 1.000 ‘nu hơioh vang truh Gơmăng akŏm.

Đei pơgơ̆r lơ đơ̆ng ‘năr 19/9 truh ‘năr 29/9 sơnăm ‘nâu, Tơdrong jang Trung thu ăn kơ oh “Hơdrŭng ŭnh kơ đeng tơ̆k hơdăh tơdrong hơ pơi ‘meh” hlôi păng tŏk bŏk đei Đoàn hơdruh tơdăm, Jơnŭm Khŭl rim tơring, rim anih jang Khŭl pơgơ̆r hăm lơ tơdrong jang hơiă hăm hloh 5 triệu tŏ ŭnh kơ đeng păng tơmam trung thu pơjao asong ăn kơ đe oh hơioh lơ̆m teh đak. ‘Nâu jĭ tơmam gơmăng Trung thu ‘măn ăn kơ đe mon hơioh đei tơdrong arih sa mơmat tat. Pơma tơ̆ Gơmăng akŏm, Kơdră teh đak Võ Văn Thưởng gơih truh đe oh hơioh lơ̆m teh đak nơ̆r apĭnh gia ‘mêm kơ eng păng ‘meh Trung ương Đoàn hơdruh tơdăm Cộng sản Hồ Chí Minh păng dôm anih jang, khŭl jang păng đĭ đăng tơpôl vang hơnơ̆ng tơgŭm vă “sơnăm hơyơ đe mon hơioh kŭm đei ngôi pơchơt, pơcheh, vang tơgŭm tơdrong hiôk chơt.”