Kơdră tĕh đak Võ Văn Thưởng truh akŏm păng pơjao dôm tơmam hơpăh kăp gĭt đơ̆ng Đảng, tĕh đak ăn dôm khul grŭp păng rim bơngai iŏk đei lơ̆m jơ pơm lêh. Pơma tơ̆ jơ pơm lêh, Kơdră tĕh đak Võ Văn Thưởng đei nơ̆r hơiă păng pôk pơ ư khul linh jang srĕp kơ Khul linh tĕh đak lơ̆m vă jê̆ 78 sơnăm pơjing, tơblăh păng jang tŏk, tơgop tih tên ăn tơdrong jang tơblăh iŏk rơngei hơdrĕch hơdrung, pơjing đei 1 tĕh đak kơjăp ‘lơ̆ng adrol sơ̆, kŭm nhen lơ̆m tơdrong jang tơiung pơjing păng vei lăng tĕh đak hrei ‘nâu.

Tơ̆ hơnăp kơnh, Kơdră tĕh đak athei Anih jang srĕp kơ khul linh tĕh đak mă lơ̆m khei ‘năr yơ, đei tơdrong kiơ kŭm hơnơ̆ng vei kơjăp trong jang yoa Đảng chĕp kơ̆l lơ̆m rim tơdrong. Anih jang srĕp kơ Khul linh tĕh đak athei hơnơ̆ng jang ‘lơ̆ng hơnăp jang ‘nŏh jĭ Anih jang srĕp gĭt kăl kơ Đảng, tĕh đak păng anih juăt jang srĕp kơ Quân ủy Trung ương, Anih tơnm vei lăng khul linh tĕh đak; pơvih ‘lơ̆ng hlŏh, đei yoa hlŏh ăn Kơdră chĕp kơ̆l Đảng, tĕh đak, Quân ủy Trung ương, Anih tơm vei lăng khul linh tĕh đak mưh hơlen năng rim tơdrong, chih hơdăh trong jang păng sek tơlang dôm tơdrong kăl, ưh gơ̆h lê̆ đei tơdrong ưh tom băt, ưh ê... hơnơ̆ng tơgăl jĭ “đon hăm măt” Đảng, tĕh đak păng Khul linh.