Hnam trưng Đại học Thái Nguyên dang ei đei hloh 70 rơbâu ‘nu bơngai hŏk, sinh viên, lơ̆m noh đei vă jê̆ 1 rơbâu hŏk tro đơ̆ng teh đak đe; hăm  khŭl thây kô pơtho ‘noh đei 2.500 ‘nu. Hnam trưng Đại học Thái Nguyên hrei ‘nâu hlôi sơkơ̆t hơdăh đei hơnăn, bưng ai tih kơ 1 hnam trưng đại học tơm teh đak, hơtŏk tơiung tôm tơdrong pơđĭ găh tih lơ, pơtho hŏk lơ tơdrong jang păng ‘lơ̆ng.

Kơdră teh đak kơplăh dang ei athei Hnam trưng Đại học Thái Nguyên kăl hơnơ̆ng vei kơjăp păng tơlĕch jang kiơ̆ ‘lơ̆ng dôm tơdrong jang tơgŭm đơ̆ng Đảng, teh đak găh tơplih ‘nao, tôm tơdrong pơtho pơhrăm, găh hơtŏk tơiung tơring; hơdai hăm athei hơbĕch hơbal, pơcheh hơgei, đei trong jang, hơyak năm trŏ lăp. Anih tơm vei lăng găh pơtho pơhrăm, dôm anih tơm, anih jang Trung ương, dêh char Thái Nguyên păng dôm tơring hơnơ̆ng bơngơ̆t truh, pơm tơdrong hiôk păng ‘măn jên jang tơgŭm ‘lơ̆ng hloh vă Hnam trưng Đại học Thái Nguyên hơtŏk tơiung kiơ̆ ƀlep trong hlôi tơlĕch ăn.