Lơ̆m năr bơ̆jang mă blŭng kơ ‘măng hop akŏm mă 8, Quốc hội jăl 15, kơsơ̆ brei (21/10), Quốc hội hlôi pơgơ̆r pôk Kơdră teh đak Cộng hòa xã hội chủ nghĩa Việt Nam jăl jang 2021-2026. Pơtôch, Bơngai jang lơ̆m Anih tơm Chĭnh trĭ, Chĕp kơ̆l pơgơ̆r Ban Bí thư Lương Cường hlôi đei Quốc hội pôk pơm Kơdră teh đak Cộng hòa xã hội chủ nghĩa Việt Nam jăl jang 2021-2026. Tơchơ̆t găh tơdrong pôk ƀok Lương Cường pơm Kơdră teh đak hlôi đei dôm bơngai tang măt Quốc hội yơ̆r ti pơdrơ̆ng kiơ̆ hăm kơ sô̆ bơngai tang măt vang yơ̆r ti drơ̆ng lăp. Tơ̆ hơla hla kơ ƀrê hơnglŏng dreng, Kơdră teh đak ‘nao kơ Cộng hòa XHCN Việt Nam jăl jang 2021-2026 Lương Cường pơma pơsĭt: “Mĭnh jơhngơ̆m đon hăm Teh đak, hăm Kon pơlei, hăm Khôi luơ̆t teh đak CHXHCN Việt Nam; hơdrin jang đang ‘lơ̆ng hơnăp jang đei Đảng, teh đak păng Kon pơlei pơjao ăn”. Ƀok Lương Cường rơneh ‘năr 15/8/1957; Pơlei pơla: Xăh Dữu Lâu, pơlei tơm Việt Trì, dêh char Phú Thọ. Kơdră teh đak Lương Cường hlôi iŏk jang dôm kơchư̆k jang: Chính ủy Quân đoàn 2; Chính ủy Quân khu 3. Khei 1/2016, tơ̆ Hop akŏm bơngai tang măt lơ̆m teh đak ‘măng mă XII kơ Đảng, ƀok Lương Cường đei pôk lơ̆m Anih jang chĕp kơ̆l pơgơ̆r Trung ương Đảng.

Hop akŏm ‘măng mă mônh Anih chĕp kơ̆l pơgơ̆r Trung ương Đảng, hlôi pôk ƀok Lương Cường lơ̆m Ban Bí thư Trung ương Đảng jăl XII. Khei 4/2016, ƀok Lương Cường đei Anih tơm Chĭnh trĭ tơchơ̆t ăn pơm Kơdră Anih jang Chĭnh trĭ, Khŭl lĭnh kon pơlei Việt Nam. Khei 01/2019, ƀok Lương Cường đei hơtŏk grat Đại tướng. Tơ̆ Hop akŏm bơngai tang măt lơ̆m teh đak ‘măng XIII kơ Đảng, ƀok Lương Cường đei pôk lơ̆m Khŭl chĕp kơ̆l pơgơ̆r Trung ương. Tơ̆ Hop akŏm ‘măng mă mônh Anih chĕp kơ̆l pơgơ̆r Trung ương Đảng, ƀok Lương Cường đei pôk lơ̆m Anih tơm Chĭnh trĭ jăl XIII. Khei 5/2024, Anih tơm Chĭnh trĭ hlôi tơchơ̆t ăn Đại tướng Lương Cường, Bơngai jang lơ̆m Anih tơm Chĭnh trĭ, Kơdră vei lăng Anih jang Chĭnh trĭ Khŭl lĭnh kon pơlei Việt Nam vang jang lơ̆m Ban Bí thư păng pơm Kơdră chĕp kơ̆l pơgơ̆r Ban Bí thư.