Lơ̆m jơ ‘năr gĭt kăl, Kơdră chep pơgơ̆r Teh đak hlôi năm soh hlôt nhang, ƀlŏk hơdơ̆r Kơdră chĕp pơgơ̆r gơ̆h hơgei hloh kơ hơdrĕch hơdrung. Lơ̆m chăl hơrih, Ƀok Hô ling lang lăng tông nông gia ‘mêm kơ eng kon pơlei păng ƀô̆ đô̆i tơring Pơbăh ling lang nuih mơng pran kơtang, tơgăl hăm hơnăn "Dur kong Teh đak". Pơma truh tơring Pơbăh, Ƀok Hô hơnơ̆ng krao dôm hơnăn git kăl hloh. Ƀok krao tơring Pơbăh ‘noh “Pham kơ pham Việt Nam". Kơdră chĕp pơgơ̆r teh đak Lương Cường sơkơ̆t hơdăh hơdrin đĭ ai atŭm hăm Đảng, hăm kon pơlei kiơ̆ yok rok jơ̆ng jơhngơ̆m pran tơgoăt tơgoăl pôm nơ̆r ƀơ̆r đon, jang kiơ̆ jơnei jơhngơm đon hơpơi ‘meh vă tơ iung pơjing teh đak atŏk tơ iung pơdrong hơnŭk hơnoa. Năm tơmang hơnih gru gra, Kơdră chĕp pơgơ̆r teh đak tơƀlŏk dơ̆ng dôm tơdrong hơpơi ‘meh vă đơ̆ng Ƀok Hô  găh mĭnh teh đak Việt Nam rơngei hiôk hian, pơm tơm kơdih, hơtŏ hơnơ̆ng, pơdrŏng pran kơtang păng pơma hơdăh, Jơnei tih tên pơyan puih mak 1975 jing tơdrong jang iŏk đei jơnei ăn tơdrong hơpơi ‘meh vă ‘noh.