Kơdră teh đak năm ngôi, hmach thơ thâu Têt ăn bơngai jang bơ̆ Hnam hơdrơh sir iŏk đak dơâu tơ̆ đak dơsĭ
Thứ bảy, 09:49, 27/01/2024
VOV/Thuem tơblơ̆
VOV/Thuem tơblơ̆
VOV4.Bahnar - Hơnơ̆ng tơdrong jang năm ngôi, hmach thơ thâu Têt Nguyên Đán Giáp Thìn 2024, pơgê 26/1, đơ̆ng pơlei tơm Vũng Tàu, Kơdră teh đak Võ Văn Thưởng păng khŭl bơ̆jang hlôi hao gre vơvêl năm tơ̆ Hnam hơdrơh sir iŏk đak dâu kơ Kŏng ti Liên doanh Điều hành Cửu Long (krao kơđeh ‘noh là Cửu Long JOC), năm ngôi, pơlung, hmach thơ thâu Têt, bơ̆jang hăm kang ƀô̆, ki sư tŏk bŏk jang tơ̆ hnam hơdrơh, dôm bơngai tang măt ăn 6 rơbăn kang ƀô̆, bơngai jang tơdrong jang găh đak dâu.
Đơ̆ng rŏng kơ mơ̆ng tơroi tơbăt, Kơdră teh đak Võ Văn Thưởng gơih truh đĭ đăng kang ƀô̆, bơngai jang Hnam hơdrơh kơ Cửu Long JOC pơma hơdrô̆, đĭ đăng anih jang găh đak dâu pơma atŭm nơ̆r apĭnh jet gia păng nơ̆r hmach thơ thâu sơnăm ‘nao ‘lơ̆ng hơiă hloh. Hăm 415 triệu kơthŭng đak dâu sir iŏk đei, Kơdră teh đak lăng ‘lơ̆ng Cửu Long JOC đei tơgop gĭt kăl hăm anih jang đak dâu păng jên jang teh đak.
Pơma hơdăh, tơdrong jang hơlen lăng sir iŏk đak dâu ‘noh jĭ tơdrong jang tôch kơ gĭt kăl, Kơdră teh đak athei kang ƀô̆ đảng viên kŏng nhân grŭp jang đak dâu athei vei kơjăp thoi âu, hơtŏk tơiung mŭk drăm ling lang tơklep hăm vei sơđơ̆ng teh đak păng tơdrong vei sơđơ̆ng teh đak ling lang tơklep hăm hơtŏk tơiung mŭk drăm.
Viết bình luận