Pơma tơ̆ âu, Kơdră tĕh đak tơchĕng akhan, dôm sơnăm âu ki, khul linh Công an kon pơlei pơma atŭm, khul linh vei sơđơ̆ng chinh trĭ dơdoă pơma hơdrô̆ jang kiơ̆ ‘lơ̆ng, tơlĕch jang tơpăt ‘lơ̆ng rim nơ̆r pơtho, trong jang đơ̆ng kơdră chĕp kơ̆l Đảng, Tĕh đak hăm tơdrong jang vei lăng sơđơ̆ng chinh trĭ. Đĭ đăng khul linh hlôi hơmet pơ ‘lơ̆ng rim tơdrong pơmat tat, mât 1 ƀơ̆r đon, mĭnh jơhngâm, gơ̆h hơgei, jang đang ‘lơ̆ng rim tơdrong jang chinh trĭ đei pơjao; tơgop vei kơjăp tơdrong sơđơ̆ng ‘lơ̆ng, rơngei hiôk hian, pơjing tơdrong ‘lơ̆ng ăn tơdrong jang atŏk tơiung mŭk drăm, tơpôl kơ tĕh đak, hơtŏk anih dơ̆ng, um ai tĕh đak Việt Nam lơ̆m apŭng plenh tĕh.

Tơƀôh trong jang hăm 1,2 tơdrong tơm đơ̆ng khul linh vei lăng sơđơ̆ng chinh trĭ dơdoă tơ̆ hơnăp kơnh, Kơdră tĕh đak athei Khul chĕp kơ̆l Đảng kơ Công an Trung ương, khul chĕp kơ̆l Đảng kơ Anih vei lăng sơđơ̆ng chinh trĭ dơdoă jang ‘lơ̆ng tơdrong roi tơƀôh mưh vei lăng đon tơchĕng đơ̆ng Đảng, vei lăng tơdrong chĕp kơ̆l pơgơ̆r đơ̆ng Đảng, vei lăng chăl pơgơ̆r tĕh đak, vei lăng kon pơlei; hlôh vao rim tơdrong, hơlen, tơdra hơdrol mă trŏ rim tơdrong đơ̆ng hrôih, đơ̆ng hơtăih hăm dôm tơdrong krê, đon hơlĕnh pơdăr, tơdrong tơblăh tơdrŭt lơ̆m anih jang vă tơtom roi tơƀôh ăn dôm anih jang kơpal, đei trong tang găn, sek tơlang đei yoa ‘lơ̆ng.