Kơdră teh đak Võ Văn Thưởng hlôi năm soh nhang, ƀlŏk hơdơ̆r kơ nhap ƀok Trường Chinh - Kơdră chĕp kơ̆l 3 ‘măng pơm Tổng Bí thư kơ Đảng păng jing Kơdră Jơnŭm  vei lăng Teh đak đơ̆ng sơnăm 1981-1987. Teh đak đei dôm jơnei nhen hrei ‘nâu, hlôi sơkơ̆t hơdăh tơdrong trŏ ƀlep đơ̆ng tơdrong jang tơplih ‘nao mă  nhap ƀok Trường Chinh ‘noh jĭ bơngai tơlĕch ăn păng tơiung jang.

Kơdră teh đak Võ Văn Thưởng kŭm hlôi năm soh nhang ƀlŏk hơdơ̆r kơ nhap ƀok Đại tướng Trần Đại Quang, Kơdră teh đak đơ̆ng sơnăm 2016 truh 2018. Jĭ bơngai chĕp kơ̆l Teh đak, Kơdră teh đak Trần Đại Quang hlôi hơnhăk ăn dôm tơdrong hơiă gĭt kăl lơ̆m jơhngơ̆m đon bôl buăl apŭng plĕnh teh, tơgop hơtŏk ‘lơ̆ng anih dơ̆ng, bưng ai kơ teh đak. Ƀlep ƀơ̆t sơnăm ‘nao, Kơdră teh đak Võ Văn Thưởng hlôi năm ngôi tơ̆ Kơdră so teh đak Trần Đức Lương păng Kơdră so teh đak Nguyễn Xuân Phúc. Kơdră teh đak Võ Văn Thưởng hmach thơ thou kơ đe kơdră so chĕp kơ̆l kŭm hăm ŭnh hnam pran jăng grăng hơkâu, hiôk hian, erih sot, hơnơ̆ng ‘măn jơhngơ̆m, đon hơgei păng hlôh vao vă tơgop lơ hloh ăn tơdrong arih sa tơpôl kơ teh đak.