Soh plang nhang ƀlŏk hơdơ̆r kơ ƀok pơtao An Dương Vương, dôm bơngai tang măt tơƀôh jơhngơ̆m đon băt bơnê kơ dôm ƀok pơtao chăl hơdrol sơ̆ hlôi đei kŏng tơiung pơjing teh đak păng vei teh đak, hơ pơi ăn teh đak hiôk, kon pơlei sơđơ̆ng. Cổ Loa jĭ hơnih gru groa jơhnơr arih kăp gĭt kơ hơdrĕch hơdrŭng Việt Nam. Yak hloh dôm rơbâu sơnăm pơjing teh đak păng vei teh đak, Cổ Loa oei vei răk đei lơ kơjă kăp gĭt jơhnơr arih, joh ayŏ joăt joe ‘lơ̆ng hơiă hơdrĕch hơdrŭng.

Mă loi ‘noh lơ̆m khei ‘năr blŭng pơjing teh đak, tơring teh Cổ Loa chih đei tơdrong hơiă yua đơ̆ng jơhnơr arih nuih mơng tơklep hơdai hăm bơngai gĭt kăl Thục Phán An Dương Vương, bơngai iŏk pơtăl chăl Hùng Vương, đei kŏng pơjing teh đak Âu Lạc. Ƀlep ƀơ̆t ‘măng âu, Kơdră teh đak Võ Văn Thưởng kŭm hăm kơdră chĕp kơ̆l Trung ương păng pơlei tơm hlôi pơtăm ‘long lăng jơ̆ng ti tơ̆ Hơnih gru groa jơhnơr arih Thành Cổ Loa apŭng Đông Anh.